Framleiðendur og innflytjendur tóbaksvöru sem er ætluð til sölu á Íslandi þurfa að afhenda ÁTVR upplýsingar um vöruheiti og tegund tóbaksvöru, innihaldsefni og magn allra efna sem notuð eru við framleiðslu, losunargildi og aðra losun og losunarstig. Upplýsingar þarf að leggja fram áður en ný eða breytt tóbaksvara er sett á markað.

Undanþága gildir vegna upplýsinga um tóbaksvöru á markaði í byrjun árs 2024. Fyrir þær vörur var skilafrestur til 11. júlí 2024.

Lýsing á hvaða upplýsingar þarf að veita er að finna í kafla 6 gr. a í tóbaksvarnarlögum nr. 6/2002 og reglugerð 1250/2024 um útlit og viðvörunarmerkingar tóbaksvara, losun skaðlegra tóbaksefna, mæliaðferðir og skýrslugjöf. Reglugerðin tekur gildi 1. maí 2025.

Tilkynningum um tóbaksvörur á að skila rafrænt á netfangið . Einnig er mögulegt að afhenda gögnin rafrænt á Stuðlahálsi 2.

Unnið er að því að opna aðgang að sameiginlegri rafrænni aðgangsgátt ESB (EU-SEG) sem verður framtíðarfyrirkomulag fyrir tilkynningar um tóbaksvörur. Nánari leiðbeiningar um skil á upplýsingum í sameiginlegu gáttina verða veittar síðar.

Upplýsingum um innihald og losun þarf að skila fyrir allar tóbaksvörur

Upplýsa þarf um innihaldsefni og magn allra efna sem notuð eru við framleiðslu sbr. 6.gr. a í tóbaksvarnarlögum og 5.gr. reglugerðar nr. 1250/2024.

Fyrir sígarettur þarf að upplýsa losunargildi tjöru, nikótíns og kolsýrings. Ef aðrar upplýsingar um losunargildi liggja fyrir þarf að upplýsa um þau fyrir allar tóbaksvörur.

Skýrslur um rannsóknir á aukefnum

Framleiðendum og innflytjendum sígarettna og vafningstóbaks ber að leggja fram tækniskjal þar sem fram kemur lýsing á aukefnum sem eru notuð og eiginleikum þeirra.

Ef vörur innihalda aukefni í forgangsskrá ríkir sérstök skylda sem lýst er í 6. gr reglugerðar 1250/2024 og tengdum viðaukum.

Nýjar tóbaksvörur

Framleiðendur og innflytjendur þurfa að tilkynna ÁTVR um nýjar tóbaksvörur sem áformað er að markaðssetja á Íslandi 6 mánuðum fyrir áætlaða markaðssetningu. Nánari lýsingu er að finna í 7. gr. reglugerðar 1250/2024. 

Með nýjum tóbaksvörum er átt við vörur aðrar en þær sem flokkast sem sígarettur, vafningstóbak, píputóbak, vatnspíputóbak, vindlar, smávindlar, tuggutóbak, neftóbak eða munntóbak. Dæmi er hituð tóbaksvara.

Jurtavörur til reykinga

Tilkynna þarf jurtavörur til reykinga sem eru þegar í sölu. Nýjar og breyttar vörur þarf að tilkynna fyrir markaðssetningu.

Upplýsa þarf um innihaldsefni og magn allra efna sem notuð eru við framleiðslu.

Tilkynningum um tóbaksvörur á að skila rafrænt á netfangið tobaksskyrslur@atvr.is. Einnig er mögulegt að afhenda gögnin rafrænt á Stuðlahálsi 2. 

Fjallað er um tilkynningar og upplýsingar í reglugerð 1250/2024. 

Tilkynntar vörur

- í vinnslu - 

Hér er væntanleg skrá með tóbaksvörum / jurtavörum

Árlegar skýrslur um sölumagn

Framleiðendur og innflytjendur tóbaksvöru sem seld er á Íslandi þurfa að senda ÁTVR skýrslur um sölumagn tóbaksvöru á liðnu ári eftir vöruheiti og tegund. 

Frestur til að skila inn sölutölum vegna 2024 er til 1. maí 2025. 

Ekki er krafist ársskýrslu vegna sölu 2023. 

Gert er ráð fyrir að skýrslunum verði skilað í gegnum sameiginlega rafræna aðgangsgátt Evrópusambandsins (EU-SEG).

Í 6. gr. a í lögum nr. 6/2002 er gerð krafa um að árlegar skýrslur verði einnig sendar embætti landlæknis. 

Fjarsala tóbaksvöru til neytenda yfir landamæri Íslands er óheimil sbr. 6.gr.h. í lögum nr. 6/2002.

Heilbrigðisnefndir veita leyfi til sölu tóbaks í smásölu. Þær upplýsa ÁTVR um útgefin og niðurfelld leyfi. Neðangreint er skrá yfir þá sem hafa leyfi til smásölu tóbaks. 

Smellið á örina neðst í hægra horni til að stækka listann.

Einnig er hægt að smella hér til að sjá listann.

Fyrir 11. maí 2025 þurfa allir rekstraraðilar að vera skráðir í rekjanleikakerfi tóbaksvöru.

Ein helsta breytingin sem verður með nýju lögunum er að allir einingapakkar tóbaksvöru sem seldir verða á Íslandi skulu merktir með einkvæmu auðkenni. Með því verður hægt að rekja feril vöru frá framleiðenda til fyrsta smásala. Þannig þurfa framleiðendur, innflytjendur, heildsalar og  flutningsaðilar að skanna inn og út vörur til staðfestingar á því hvaða vara er stödd á hvaða stað og hvenær. Þessir aðilar þurfa að skrá sig í rekjanleikakerfið og aðlaga tæknilausnir að kerfinu til að geta tekið þátt. Smásalar þurfa einnig að skrá sig í kerfið.

Fyrirkomulag rekjanleikakerfisins verður kynnt nánar síðar en reglugerð er í vinnslu í heilbrigðisráðuneytinu.

Handbók ESB fyrir hagaðila í evrópska rekjanleikakerfinu lýsir hlutverkum hagaðila í meginatriðum.