Mörgum finnst smá víndreitill sjálfsagður hluti af góðri sósugerð. Hversu margir velta þó vöngum yfir því hvaða vín þeir nota í sósuna sína? Alltof oft notar fólk síðustu dropana frá síðustu viku eða ódýrasta vínið sem fannst í vínbúðunum. Þetta er merkilegt í ljósi þess að fæstir myndu nota illa farið og ólystugt rósmarín í uppáhalds sósuna sína, hvað þá skipta henni út fyrir þá kryddjurt sem ódýrast fæst þann daginn. Að sjálfsögðu er best að vanda valið á víninu í sósuna þar sem það er jú einn aðal bragðgjafinn í mörgum sósum.
Hér eru nokkur góð ráð um notkun vína í sósur fyrir áhugamenn um matargerð:
- Ekki elda með víni sem þú myndir ekki drekka. Oxað vín (t.d. vín sem hefur staðið opið í tvær vikur á eldhúsborðinu) skánar ekkert í sósu.
- Best er að nota létt vín eins og Pinot Grigio frá Norður-Ítalíu þegar útbúa á léttar sósur og að sama skapi þung vín eins og Cabernet Sauvignon fyrir þær bragðmeiri.
- Bragð verður ávallt sterkara þegar vínið er soðið niður.
- Fyrir þungar og feitar sósur henta sýrurík vín eins og Sauvignon Blanc afar vel, og einnig má notast við óeikað Chardonnay.
- Heppilegast er að nota sama vínið í sósuna og borið verður fram með matnum. Þannig er öruggt að vínið og maturinn falla fullkomlega hvort að öðru. Ef vínið er í dýrari kantinum er hægt að nota ódýrara vín í sósuna og setja smá lögg af dýrara víninu í lokin til að tengingin náist.
