Sala áfengis í vikunni fyrir verslunarmannahelgi var 12,2% meiri í lítrum talið en í sömu viku fyrir ári.  Samtals seldust 783 þúsund lítrar af áfengi í ár en í sömu viku í fyrra seldust 698 þúsund lítrar.  Sambærileg aukning er í fjölda viðskiptavina en 127 þúsund viðskiptavinir komu í Vínbúðirnar í vikunni fyrir verslunarmannahelgina, en í sömu viku í fyrra komu 113 þúsund viðskiptavinir í Vínbúðirnar.  Fjölgun viðskiptavina er því 12,1%.

Föstudagurinn fyrir verslunarmannahelgi er venjulega einn annasamasti dagur ársins í Vínbúðunum og síðastliðinn föstudagur var þar engin undantekning.  44 þúsund viðskiptavinir komu í Vínbúðirnar þann dag á meðan 38 þúsund heimsóttu Vínbúðirnar sama dag fyrir ári.

Í Vínbúðinni í Vestmannaeyjum komu um 1400 viðskiptavinir föstudag og laugardag um verslunarmannahelgi í fyrra, en í ár heimsóttu um 2.100 viðskiptavinir Vínbúðina.  Aukningin er því um 55% milli ára.  Á Akureyri komu um 3.600 viðskiptavinir sömu daga fyrir ári en 4.300 í ár og er aukningin milli ára því um 20%.

Ef einstakir dagar í vikunni eru bornir saman má sjá að fleiri viðskiptavinir komu í Vínbúðirnar mánudag, þriðjudag og miðvikudag en í fyrra.  Einnig er föstudagurinn töluvert stærri en föstudagurinn í viku 31 fyrir ári.