Sala áfengis í vikunni fyrir verslunarmannahelgi var 2% meiri í lítrum talið en í sömu viku fyrir ári. Samtals seldust 727 þúsund lítrar af áfengi í ár en í fyrra seldust 713 þúsund lítrar. 2% fleiri viðskiptavinir komu í Vínbúðirnar á tímabilinu en í fyrra eða rúmlega 128 þúsund viðskiptavinir á móti tæplega 126 þúsund viðskiptavinum í fyrra.
Sala fimmtudags, föstudags og laugardags var meiri nú en sömu daga fyrir ári. Aukningin á fimmtudeginum var 6,5%, 9,9% á föstudeginum og 5,2% á laugardeginum. Á móti var samdráttur í sölu á miðvikudeginum tæplega 24%.
Föstudagurinn fyrir verslunarmannahelgi er jafnan annasamasti dagur vikunnar og í ár var engin undantekning á því. Tæplega 248 þúsund lítrar seldust á föstudeginum og tæplega 41 þúsund viðskiptavinir komu í Vínbúðirnar. Til samanburðar má geta þess að á föstudeginum í vikunni á undan (26.júlí) komu 31.600 viðskiptavinir í Vínbúðirnar og á föstudeginum fyrir verslunarmannahelgi í fyrra komu 37.600 viðskiptavinir í Vínbúðirnar.
Örlítið fleiri viðskiptavinir komu í Vínbúðina í Vestmannaeyjum þessa viku en í fyrra og munar tæplega 1% á milli ára. Athyglisvert er þó að tæplega 27% fleiri komu við í vínbúðinni á fimmtudeginum í ár en í fyrra og um 10% færri á föstudeginum.
Í Vínbúðina á Akureyri komu tæplega 7.900 viðskiptavinir í ár en tæplega 8.800 í fyrra. Er samdrátturinn 10,5% á milli ára.
Til samanburðar komu 3,6% fleiri viðskiptavinir í Vínbúðirnar í Skeifunni, Austurstræti, og Dalvegi í ár en í fyrra, 28.430 á móti 27.450 í fyrra