ÁTVR hefur ákveðið og tilkynnt til hlutaðeigandi aðila að hætt verði innkaupum á reyklausa tóbakinu Lunda og að ekki verði teknar í sölu nýjar tegundir á meðan úr því verði skorið hvort þessar vörur séu í raun munntóbak frekar en neftóbak. Margar vísbendingar eru um að reyklaust tóbak sé frekar notað í munn en nef, ólíkt því sem var á árum áður. Þetta á líka við um íslenska neftóbakið en líkur eru á að það sé í auknum mæli notað til töku í munn frekar en nef. ÁTVR lítur svo á að svara þurfi hvort og hvenær neftóbak verður munntóbak.

Íslenska neftóbakið hefur verið eina reyklausa tóbakið á markaði hérlendis í um 70 ár en Lundi kom á markað síðastliðið haust. Á undanförnum mánuðum hefur ÁTVR borist nokkur fjöldi umsókna um nýjar tegundir af reyklausu tóbaki.

Meginregla tóbaksvarnarlaga er að bannað sé að flytja inn til Íslands, framleiða og selja neftóbak. Undantekningin er að heimilt hefur verið að selja grófkorna neftóbak (skv. skilgreiningu) og á þeirri heimild hefur íslenskt neftóbak verið framleitt og selt hérlendis frá því um 1940, hins vegar er bannað að selja fínkornótt neftóbak og allt munntóbak.

Velferðarráðuneytinu hefur verið kynnt málið og velferðarráðherra verið sent bréf þar sem óskað er eftir afstöðu ráðuneytisins til þess, en tóbaksvarnir eru á forræði ráðuneytisins. ÁTVR bendir meðal annars á að skilgreiningar varðandi nef- og munntóbak séu óljósar. Í núverandi lögum nær skilgreiningin nær eingöngu til kornastærðar en ekki til rakastigs. Rakastig getur hins vegar skorið úr um það hvort yfirhöfuð sé hægt að taka tóbakið í nef.

Ekki er á þessu stigi hægt að segja neitt um hverjar lyktir þessa máls verða. Það veltur á afstöðu löggjafans. Það er hins vegar skoðun ÁTVR að verði lagaumhverfið óbreytt blasi við að „nef“tóbakstegundum muni fjölga umtalsvert á næstunni.

Reiknað er með því að þrír til fimm mánuðir geti liðið þar til endanleg niðurstaða liggur fyrir.